YE EMWIN NE U GUALO WEWE VBE ENI ENREN: READ THE ROR IN EDO LANGUAGE

    YE EMWIN NE U GUALO WEWE VBE ENI        ENREN

Alughaẹn re ẹkpo a tu tie eni Igiesu kẹ kevbe a nọ emwin vbe eni ẹnrẹn. Te ọ wa khẹke na rẹn alughaẹn ne ọ re uwu ẹkpo emwin eva na. Ghe ebe Roma 10:13; ọ wẹ, "Rhunmwunda, ọmwakọmwan ne ọ ra tu tie eni E Nọyaẹnmwan gha miẹn imiẹnfan." Emwa orukhọ mẹtin tu tie eni ẹnrẹn ya miẹn imiẹnfan, sokpan ne uwẹ ne ovbiyayiekristi te ima loo eni ẹnrẹn; sasa ọdakha vbe eni ẹnrẹn. 

Ne uwẹ ne ọ dọlọbiẹ, uwu ẹgbẹ Osanobua wẹ ye. A tie eni ẹnrẹn yan uwẹ nẹ, a vbe rhie re nuẹn ya gha rrọọ. Wẹ tu tie eni ẹnrẹn zẹ vbe ọmwa orukhọ ne ọ gualọ imiẹnfan. Asẹ ọ re eni Igiesu khin vbe unu ruẹn. U gha mẹtin yae ru emwinrhọkpa. Loo eni Igiesu ya si afiwerriẹ ne u gualọ vbe ehekehe vbe agbọn ruẹn. 

U gha rhie aro lele uviẹn ẹmwẹn ebe na ya kiẹre ẹna, ọ ma kha wẹ, Tu tie eni mwẹn, i gha khulo avbe esu kua vbe do mu ne ọ khọnmwin egberran. Ẹ o!Emwin ne ọ tae wẹ, ne u loo eni Igiesu da esu, mue ni khuọnmwin egberran, kpe ọkhọnmwọn oti egbe huan, ne u huẹn ne ọ wu kpaegbe vbe orinmwin. Emwin igbinna ọ re eni ẹnrẹn khin;loo ẹre!Vbe ebe Giọn 14:13-14 ọ wẹ, "Emwinkemwin ne u ra nọ vbe eni mwẹn, ọ re i ra ruu…U gha nọ emwinrhọkpa vbe eni mwẹn i ghi ruu ẹ. "

A miẹn ẹmwẹn udinmwẹn na! Ne ọ re wẹ, u gha mẹtin nọ emwinrhọkpa vbe eni ẹnrẹn, ọ ghi vbe sunu. Vbe igiemwin wẹ, emwin sunu, ne u ra ya tie Igiesu!Igiesu!Igiesu rhunmwunda afiamma fian ra ohan muẹn, te emwin ne u gualọ vbe eni ẹnrẹn. Ya asẹ ne ọ rhie nuẹn ya guan. U kha wẹ, "Vbe eni Igiesu, i nọ egberranmwẹn nian, "ra vbe eni Igiesu, wẹ ne esu ebiebi, I gbe uhi nuẹn nian ne u zobọ vbe egbe ẹre , ne u ladian!"

Yerre vbe ẹghẹ hia ghẹ u wẹ ọ re ọdakha rhunmwunda eni Igiesu wẹ loo. Emwin hia vbe agbọn, na bẹghe kevbe na i bẹghe yase avbe arrioba ẹvbo, ẹkete, emwin ni re ideghedeghe, ẹtin kevbe iwegbe, ehia re ototọ eni Igiesu. Ya iyayi ye eni ẹnrẹn tie emwin ne u gualọ ladian, u gha vbe miẹ ọẹn rhie ighẹ emwin ne u gualọ, u levba do gha mwẹn asosẹ yi. Uyi ọghosa! 

Erha noghan, u ru ese ye asę kevbe ętin ne u rhie mẹ ya loo eni Igiesu. Uwu asę na me na khian, loo odakha ni mwen yan ukpokpo kevbe ologhomwan. I tie ofumwegbe, egberranmwen, kevbe uwa vbe eni Igiesu. I kponmwọn ya iyayi ne o si rre vbe a gha loo eni Igiesu ya afiwerrie vbe do mu aho oghe uwe se. Ise!